Voru þau ekki farin?

Útsala á notuðum mótmælaskiltum. 

Ók á 13 hreindýr

Útsalan heldur áfram

Geysilegt úrval notaðra skilta. Gerið góð kaup. Má mála yfir og nota aftur.

Eigum einnig mikið magn af bolum. Allt á að seljast, lækkað verð, aðeins 150 kr. allar stærðir.

Sérstakt tilboð: Geir Ólafs bolur, aðeins 25 kr.

 

Útsala á skiltum

Skiltagerð Hallgríms er með útsölu á skiltum. Nú er rétti tíminn til að gera góð kaup.

Stæðaskortur fyrir einkaþotur háir þátttakendum umhverfisfundarins á Bali

Sá óþægilegi sannleikur rann upp fyrir mörgum af hinum umhverfismeðvituðu stjórnmálaforingjum sem sitja ráðstefnu Sameinuðu þjóðanna um alheimshlýnun á Bali að engin stæði voru laus fyrir einkaþoturnar þeirra þegar þeir komu á fundinn. Urðu einkaflugstjórarnir, eftir að hafa sett stjórnmálaforingjann frá borði, að fljúga til Indónesíu og bíða þar. Ástæðan fyrir þessu plássleysi var sú að flugvöllurinn á Bali réð ekki við allan þennan fjölda einkaþotna sem fylgdi ráðstefnunni, en þar er einungis pláss fyrir 15 þotur.

Það er glöggt merki um geysilega meðvitund stjórnmálaforingjanna að Evrópusambandið ræðir nú um að leggja háan skatt á flugferðir, að, frá og innan Evrópu, svo almenningur, ekki síst á Íslandi, noti lestir meira, og minnki þannig gróðurhúsagasið. Það var mjög líklega stæðaskorturinn á Bali sem opnaði augu þeirra endanlega fyrir vandanum. Hvar á að leggja einkaþotunum fyrir bölvuðum almenningsþotunum sem fylla alla flugvelli?

Á annarri ráðstefnu sem haldin er á sama tíma og sú á Bali en á vegum Heimsverndar var ályktað að ef menn vilja bæta heiminn verði þeir að byrja á sjálfum sér. Tillaga um að leggja sérstakan skatt (100%) á einstaklingana persónulega (svo þeir geti ekki látið almenning borga) sem ferðast til og frá ráðstefnum um umhverfismál var samþykkt einróma og hefur Heimsvernd sent Evrópusambandinu tilskipun þess efnis. Ástæða fyrir álagningu skattsins er sú að hvetja stjórnmálamenn til að ferðast meira með lestum og skipum, en því miður virðist sem enginn stjórnmálamaður hafi ferðast frá Evrópu til Balí eftir jörðinni. Það er mikið hneyksli á vorum viðsjárverðu hlýnandi tímum. Enn á eftir að koma í ljós hvort stjórnmálamennirnir sjái að sér og ferðist frá Balí til Evrópu upp á gamla góða umhverfisvæna mátann.

Einn þátttakenda á ráðstefnu Heimsverndar, Sigurgeir Orri Sigurgeirsson, sagði við blaðamann Skinhelgi - tímarit um umhverfismál að mesta hættan sem stafar að mannkyni vegna hlýnunar jarðar er aukin skattheimta til að draga úr útblæstri koldíoxíðs. „Óvissan um árangur af aðgerðum gegn auknu gróðurhúsagasi er svo mikil að ekki er forsvaranlegt að leggja út í milljarðakostnað með skattheimtu. Til samanburðar má benda á að aðgerðir gegn ósónlaginu hafa engum árangri skilað þrátt fyrir boð og bönn og mikinn fjáraustur. Ósóngatið yfir Suðurskautinu hefur aldrei verið stærra en nú. Líkur eru miklar á því að gatið hafi alltaf verið þarna en það varð ekki að vandamáli fyrr en menn fundu það. Raunar er það nú svo að þegar flugvél flýgur um loftið skilur hún ekki aðeins eftir koldíoxíð, heldur líka ósón, þetta sama ósón og menn héldu að væri að hverfa fyrir 20 árum. Miðað við hve gatið er stórt yfir Suðurskautinu ætti Evrópusambandið að hvetja til aukinna flugferða ef það mætti verða til þess að stoppa í ósónullarsokkinn.“

Önnur ályktun sem samþykkt var á ráðstefnu Heimsverndar var svohljóðandi: „Umhverfisvernd eins og hún birtist okkur í stjórnmálum samtímans er nýjasta áhugamál þeirra sem ráðskast vilja með aðra. Búinn er til málstaður sem gefur hinum stjórnlyndu tylliástæðu til að skerða frelsi annarra í formi boða og banna, skatta og hafta. Frjálslyndu fólki ber skylda til að berjast gegn þessari ásælni af sama krafti og barist var gegn fyrri áhugamálum stjórnlyndra: kommúnismanum og sósíalismanum. Sjúkdómseinkenni stjórnlynds einstaklings birtist í því að sjúklingurinn veit manna best hvað öðrum er fyrir bestu og ætlast til þess að aðrir breyti samkvæmt því, en um hann sjálfan gilda ekki sömu reglur. Sá stjórnlyndi flýgur á einkaþotu á ráðstefnur um umhverfisvernd og leggur til að skattar verðir hækkaðir á flugferðir almennings til að draga úr mengun.“

Að lokum er hér áhugavert umhverfisverndarpróf sem ég rakst á á síðu bloggvinar míns.

Gore: Breyttar áherslur í loftlagsmálum með nýjum forseta

Tilkynning um nýjar reglur í pólitískri orðræðu

Brussel 9. desember 2007 

Reglugerðarstofnun Evrópu hefur gefið út nýjar reglur um orðræðu í pólitík. Um leið fellur úr gildi eldri reglugerð frá árinu 1946. Gömlu reglurnar voru frá því fyrir kaldastríð og því orðnar úreltar. Reglugerðin er samtals 1198 blaðsíður í A3 broti. Helstu breytingar eru þessar:

Þegar fjallað er um stjórnmálaástandið í Rússlandi á líka að fjalla um stjórnmálaástandið í Ástralíu og bera ríkin saman að leiðtogum ekki undanskildum. Ástralía hefur samkvæmt nýju reglunum tekið við af Bandaríkjunum.  

Reglugerðasmíðasérfræðingaráðherraembætti Evrópusambandsins. 

Sólin eða ég?

Vetur, sumar, vor og haust / vildi ég draga ýsu.

Ég eftirlæt vísnavinum að botna þennan fyrripart, en langar á meðan að flytja merkileg tíðindi:

Veturinn er kaldari en sumarið!

Þetta kann að hljóma eins og engin sérstök tíðindi og það er rétt, þetta er alkunn staðreynd. Þó hefur mér fundist eins og sumir hafi gleymt þessu. Einkum þeir sem telja að vindgangur manna og dýra ásamt öðrum útblæstri koldíoxíðs sé skýringin á hækkandi meðalhita á jörðinni en ekki mismunandi mikill hiti frá ofninum okkar, sólinni. Enginn deilir um að sveiflur í hitastigi milli árstíða má rekja beint til sólar, vegna afstöðu jarðarinnar til hennar, en sveiflur á heildarhitastigi þeirrar sömu jarðar verða klárlega ekki raktar til sólarinnar ef eitthvað er að marka hinn sannfærða hóp sem sér ekki til sólar fyrir kenningunni um hlýnun af mannavöldum. Er ekki eitthvað bogið við það?

Þegar ég horfði á þessa ljósmynd sem ég sá á síðu Ágústs Bjarnasonar spurði ég mig grundvallarspurningar um geiminn og okkur og jörðina og sólina. Ég man spurninguna ekki orðrétt, en hún er eitthvað á þessa leið: Sólin eða ég?

Ágúst hefur fjallað um áhrif sólar á hitastigið á jörðinni, en það eru danskir vísindamenn sem fremstir eru í þeim flokki. Samkvæmt þeirra mælingum hafa sveiflur í hitastreymi frá sólinni bein áhrif á hitastig jarðar, en það er náttúrlega bara vitleysa, alveg eins og það er óhrekjanleg staðreynd að Guð bjó jörðina til fyrir 6000 árum eða svo. Sem betur fer á að fara nánar í saumana á kenningum Baunanna. Ef þeir reynast hafa rétt fyrir sér verða þeir að sjálfsögðu brenndir á báli og Al Gore og Guðni Elísson halda áfram að breiða út boðskapinn.

Vetni tapar, rafmagn vinnur

Vetnið er ekki framtíðarorkugjafi á Íslandi, ekki vegna þess að það sé svo slæmt, heldur stenst það ekki samanburð við rafmagnið. Rafmagnið er allstaðar, hvert heimili er „bensínstöð“, flutningskerfið er tilbúið, ekki þarf að aka því með tankbílum á bensínstöðvar eins og vetninu og þróunin í rafhlöðum er afar hröð, þær halda meiri og meiri orku og verða æ léttari. Auk þess er óþarfi að nota rafmagn til að búa til vetni þegar hægt er að nota það beint með betri árangri. 

Spurningin er því sú hvers vegna það er ekki hægt að kaupa tvíorkubíla eins og Toyota Prius með hleðslutæki sem stinga má í samband í venjulega innstungu? Hvað kemur í veg fyrir að þeir eru framleiddir þannig? Hvers vegna nota rándýrt bensínið til að hlaða geymana þegar hægt er að hlaða þá heima fyrir miklu lægra verð?

Um leið og bílar sem hægt er að hlaða heima hjá sér koma á markað, hætta allir að tala um vetni. Því spái ég.

Stóra spurningin sem ég ætla að endurtaka núna er: Hvenær kemur Prius með innstungu? 

Í framhaldi af þessu má spyrja enn einnar spurningar: Hví ekki ganga alla leið, sleppa sprengihreyflinum og styðjast eingöngu við rafmagnið? Það styttist mjög í það, hér er myndband sem er kynning á Tesla Roadster sportbílnum. Tesla er svo kraftmikill að hann er fljótari en hraðskreiðustu bensínbílar í hundraðið. Síðast þegar ég gáði var Tesla afar dýr, en með tíð og tíma lækkar verðið og þá mega olíufurstarnir í miðausturlöndum og Rússlandi fara að vara sig. 

Sigurgeir Orri gagnrýnir Pútín harðlega

Í þrumandi ræðu sem Sigurgeir Orri hélt á Laugardalsvellinum nýlega gagnrýndi hann Pútín Rússlandsforseta harðlega og sagði hann ekkert annað en einræðisherra sem léti myrða andstæðinga sína eða varpa þeim í fangelsi, samanber Önnu Politkovskaiu og Kodorkovski. Einnig sagði Sigurgeir Orri að hann héldi Rússlandi í heljargreipum valdagræðgi sinnar og að Pútín og lagsmenn hans væru í raun glæpaklíka sem stjórnaði landinu eins og það væri fyrirtæki í þeirra eigu. Að nú um stundir snerist allt líf Pútíns um að búa svo um hnútana að hann geti haldið völdunum án þess að þurfa að kveikja í stjórnarskránni. Um miðbik ræðunnar sagði Sigurgeir Orri það skýr merki um einræðistilburði Pútíns að hann hafi skrúfað fyrir alla frjálsa fjölmiðla og félagasamtök og komið í veg fyrir að fylgst væri með komandi kosningum af Öryggisstofnun Evrópu. Lokaorð Sigurgeirs Orra voru: „Herra Pútín, við sjáum í gegn um þig, við þekkjum glæpamenn sem dulbúa sig sem stjórnmálamenn. Gerðu landi þínu það mesta gagn sem þú nokkru sinni hefur gert: Virtu leikreglur lýðræðisins og farðu frá völdum eins og stjórnarskráin segir til um.“

Pútín gagnrýnir Vesturlönd harðlega

Kominn út úr brauðskápnum!

Sigurgeir Orri (40) er kominn út úr brauðskápnum. „Það gerðist þannig,“ sagði Sigurgeir Orri í samtali við blaðið, „að ég hætti að kaupa 3, 4, 5, 6 og 7 korna brauð, heilsubrauð, speltbrauð, hverabrauð og hvað þetta dót nú heitir allt saman. Nú kaupi ég eingöngu hvítt brauð því mér þykir það best og hefur raunar alltaf þótt.“

Samviskubit frá æskuárunum 

„Þegar ég var barn var mér kennt að franskbrauð væri óhollt en heilhveitibrauð hollt og ég fékk samviskubit í hvert sinn sem ég borðaði franskbrauð. Svo komu brauð með korni og þau þóttu taka heilhveitibrauðinu fram í hollustu. Það sem sló þau svo út var speltbrauðið, það átti aldeilis að vera langhollast í heimi, enda bakað úr korni sem vaxið hefur villt í milljón ár. Samviskusamlega elti ég hollustubylgjuna eins og flón. En nú er ég sem sagt hættur því; er kominn aftur heim.“

Þarmakítti

Það hefur verið sagt að hvítt brauð, brauð án korna, sé vont í garnirnar, sé svokallað þarmakítti. Ertu sammála því? „Nei, það er ég ekki. Að minnsta kosti sakna mínir þarmar ekki fjölkornabrauðsins. Ég tel að sú bábilja að kornabrauð sé gott í garnirnar sé eingöngu sölumennska. Fólki er seld þessi „speki“ á læknisfræðilegum forsendum. Ekki í fyrsta skipti, það get ég sagt þér. Ef þú telur að korn geri iðrunum gott mæli ég með að þú fáir þér til dæmis 1 bolla af birkifræi og skolir því niður með mysu.“ En nú þykir sumum gott að borða brauð með korni og sækist beinlínis eftir því. Til að mynda er rúnstykki með birkifræi góður matur. „Því er ég sammála. Mér þykir rúnstykki með birki mjög gott, enda er það hvítt brauð skreytt með korni. Ég er ekki að halda því fram að öll brauð önnur en hvít séu vond, þótt það standi svart á hvítu hér að framan. Það var til að mynda brauð sem fékkst í Matval (eða var það mjólkurbúðin?) á Þinghólsbrautinni sem mér þótti afar gott. Það var la la heilhveitibrauð, en skorpan var góð; hún var rétt brennd. Nú fæst þetta brauð ekki lengur. Einnig þótti mér normalbrauð nokkuð gott, sérstaklega ef á það var smurt þykkt lag af smjöri. Þegar ég borðaði það fannst mér eins og ég væri normal, félli í hópinn. Nú um stundir gerir kókið þetta fyrir mig. Þegar ég drekk kók finnst mér ég vera hamingjusamur og hluti af einhverju skemmtilegu, hlæ með fallega fólkinu.“

Uppskriftir

Þú hlýtur að luma á uppskriftum ef ég þekki þig rétt? „Það er hárrétt hjá þér, og er til marks um hversu vel þú hefur unnið heimavinnu þína. Hér er uppskrift að léttum rétti: Tvær franskbrauðsneiðar um það bil 12 mm þykkar. Ekta smjör, Gotta-oststykki, brauðrist, smjörhnífur, ostahnífur. Brauðsneiðarnar settar í brauðristina og ristaðar þar til á þær kemur gullinn grillblær. Teknar úr brauðristinni og smurðar með þykku lagi af ekta smjöri. Tvær til þrjár sneiðar af osti, eftir smekk, settar á hvora sneið. Tillaga að meðlæti: Mysa með einni teskeið af mysingi.“

Slefað og skeint þakkar Sigurgeiri Orra fyrir spjallið og hvetur lesendur til að prófa uppskriftina. 

Hreyfði fingurinn frá vinstri til hægri

Sigurgeir Orri (40) hreyfði vísifingur vinstri handar frá vinstri til hægri í gær. Í samtalið við blaðið, skömmu áður en það fór í prentun, sagði hann að þótt hann gerði það margsinnis á dag, var þetta sérstaklega eftirminnilegt. „Fingurinn færðist nefnilega til hægri á stólbríkinni og benti þá á sjónvarpið sem ég var að horfa á.“ Slefað og skeint tekur undir með Sigurgeiri Orra, þetta er afar sérstakt. En hvað var að gerast í sjónvarpinu? Það vilja allir lesendur vita. „Ekkert, það var slökkt á því. Ég var að horfa á það vegna þess að ég sat þannig í stólnum.“ Einmitt það.

Slefað og skeint þakkar Sigurgeiri Orra kærlega fyrir spjallið.