Fylleríinu senn að ljúka

Mig grunar að mótmælafylleríinu fari senn að ljúka. Þeir sem fyllstir hafa verið og velst um dal og hól í drottins ást og friði gegn álverum og manngerðum vötnum fá nýtt viðfangsefni: Berjast gegn timburmönnunum, gera sér grein fyrir að við lifum ekki á fjallagrösum og standa við stóru orðin um náttúruvænar atvinnuskapandi hugmyndir, til dæmis á Vestfjörðum.

Eruð þér viðundr eða hvat?

Svo er hinu fylleríinu trúlega að ljúka líka, hópfylleríinu um hlýnun jarðar af mannavöldum. Skítakuldi og mikill snjór er varla merki um að komið sé að suðumarki eða hvað? Ég minnist þess ekki að hafa séð fjallgarðinn á Reykjanesi jafn hvítan. Í fréttunum á Sky um daginn var sagt að flóðin í Bretlandi í fyrrasumar hafi ekki verið af völdum alheimshlýnunar. Vonandi birtast um það fréttir á vefjum náttúruverndarsamtaka -sinna og annarra trúarhópa.

Góðar stundir. 

Sparnaðartillögur

Skýringin á hallarekstri sýslumannsembættisins á Keflavíkurflugvelli er fundin! Henni laust niður í huga mér áðan. Þegar ég kom frá Bandaríkjunum eftir ferð þar um slóðir fyrr í vetur beið eftir mér her manns sem leitaði að sprengjum og vopnum á mér og ferðafélögum mínum. Sú staðreynd að ég fór í gegnum slíka leit nokkrum klukkustundum áður í Boston virtist ekki skipta neinu máli.

Hópur tollvarða, lögreglumanna og sérsveitarmanna, ekki færri en 10 á hverri vakt í næturvinnu (komutími vélanna frá Bandaríkjunum er síðla nætur og snemma morguns) er fljótur að segja til sín í kostnaði.

Meiri sóun á fé er vandfundin, og heimskulegra fyrirkomulag er vandfundið. 

Mér skilst að ástæðan fyrir sprengju- og vopnaleitinni við komuna frá Bandaríkjunum sé sú að ferðalangar þaðan blandist öðrum ferðalöngum í Leifsstöð. Eins og það sé hættulegt. Eru þeir ekki annars líka búnir að fara í gegnum sprengju- og vopnaleit? Ef skriffinnar Shengen-svæðisins treysta ekki sprengjuleitinni í Bandaríkjunum verða þeir að ná samkomulagi við þau um leitina, senda eftirlitsmenn á staðinn í Bandaríkjunum svo koma megi í veg fyrir þessa vitleysu. 

Ég ætla nú ekki að vera lastarinn sem líkar ekki neitt heldur koma með sparnaðartillögur. Þeim ferðalöngum sem eru að koma til Íslands og ætla ekkert annað er hægt að:

A) Aka í læstri rútu að töskufæribandinu.

B) Sía frá hinum með breytingum á stöðinni.

C) Hætta þessari vitleysu strax og gera ekkert, enda skiptir leitin engu helv. máli. 

D) Setja í læst búr á hjólum og aka þeim að færibandinu.

Þeir ferðamenn sem ætla áfram:

A) Aka þeim í læstri rútu að hliðinu í Leifsstöð þar hin sprengju- og vopnaleitin er (við innganginn).

B) Aka þeim í læstu búri að fyrrgreindu hliði.

C) Handjárna þá og draga á hárinu í gegnum stöðina að fyrrgreindu hliði.

D) Ná samkomulagi við skriffinna Schengen-svæðisins um að hætta þessari þvælu. 

Þó fyrr hefði verið

Íslendingar ættu að vita það manna best hve mikilvægt það er að viðurkenna sjálfstæði lítilla þjóða lýsi þær yfir sjálfstæði á annað borð. Þetta vissu íslenskir ráðamenn þegar Eystrasaltsríkin gerðu það og var Ísland fyrst þjóða til þess.

Þegar Kósóvó lýsir yfir sjálfstæði kemur fát og fum á utanríkisráðherrann. „Við ætluðum að vera í samfloti með norðurlöndunum“ var sagt. Svo lýsa norðurlöndin yfir stuðningi án samráðs við Ísland! „Við vildum ekki móðga Serba“ var þá sagt. Hvaða Serba? Báða Serbana sem búa á Íslandi?

Þegar hún loksins rekur af sér slyðruorðið, raggeitin, birtist það á stað við hæfi: Á blaðsíðu 6, lítil frétt neðarlega í Morgunblaðinu 5. mars 2008, 16 dögum eftir að landið lýsti sjálfstæðinu yfir (17. febrúar).

Ætli raggeitin geri sér grein fyrir að hún átti kost á að skora pólitískt mark og fá nafn sitt á forsíðuna undir stórri fyrirsögn?

Heimur batnandi fer

Um daginn keyptum við í IKEA þunn gluggatjöld, tvö í pakka, tilbúin til upphengingar fyrir einn glugga, á 800 krónur (að vísu þarf að stytta).

Fyrir nokkrum árum keyptum við í IKEA þunn gluggatjöld í metratali, ekki tilbúin til upphengingar fyrir einn glugga, á 5 þúsund krónur.

Á þessum árum hefur verðið á samskonar gluggatjöldum lækkað úr 35 þúsund fyrir alla 7 glugga heimilisins í 5600 krónur. Ekki nóg með það, heldur eru þau ekki lengur metravara heldur tilbúin vara.

Geri aðrir betur!

Heimurinn er eftir alltsaman ekki sífellt að versna.

Ingvar Kamprad og hans fólk bætir heiminn með því að bæta sig. Það er til eftirbreytni.

Undarleg tilviljun

Um daginn bloggaði ég um vin minn sem varð fyrir þeirri niðurlægingu að vera hafnað af Sorpu. Mér fannst viðeigandi að setja mynd af sófa með greininni og sló enska leitarorðið „sofa“ í google myndir. Margar myndir fundust eins og vænta mátti og margar komu til greina. En það komu ekki bara myndir af „sofa“ heldur líka þar sem íslenska orðið sofa kom fyrir og á einni þeirra voru tveir gaurar sofandi í sófa. Mér fannst myndin smellpassa við greinina og setti hana því með.

Skömmu eftir að færslan birtist hringdi vinur minn í mig og spurði hvar ég hefði fengið myndina með sögunni um ófarir hans í Sorpu, ég sagði honum sem var og bætti við að mér hafi þótt hún einkar viðeigandi, flassið speglaðist í glugganum og sófinn lúðalegur sem og sofandi strákarnir. Eftir nokkra þögn sagði hann: „En það er Kolbeinn [dulnefni] sem er á myndinni.“ „Hvaða Kolbeinn?“ spurði ég. „Kolbeinn minn, sonur minn, hann er á myndinni.“ Ég hváði við og sagði að það gæti ekki verið, það væri of mikil tilviljun til að geta staðist. En vinur minn, sem við skulum kalla Svavar, var næstum sannfærður og bað mig að senda sér slóðina þar sem myndin birtist. Ég gerði það og skömmu síðar kom staðfesting: Jú, þetta var Kolbeinn og enginn ófrægari. Hann hafði farið í LAN (Leikið sér Að Netinu) leik með vinum sínum sem stóð lengi yfir, heila nótt, sem skýrir hvers vegna þeir lágu sofandi í sófanum.

Sjaldan hef ég orðið fyrir annarri eins tilviljun og þessari. Ég þekkti drenginn ekki á myndinni, þótt ég þekki hann vel, því hann liggur með hálft höfðið undir púða. Ég segi bara eins og gamla konan: „Ja hérna.“

Nöfnum hlutaðeigandi hefur verið breytt svo þeir verði ekki fyrir óþægindum. 

Striplaðist fyrir framan barnið sitt

Sigurgeir Orri Sigurgeirsson (41) striplaðist fyrir framan son sinn, Ragnar Orra (0,11) um daginn. „Það gerðist þannig,“ sagði Sigurgeir Orri í samtali við blaðið, „að ég fór í sturtu og taldi mig hafa nægan tíma þar sem barnið var niðursokkið að leika sér inni í stofu. En áður en ég vissi var guttinn kominn inn á bað og reyndi að skríða inn í sturtuklefann. Ég varð að láta stutt bað nægja til að barnið blotnaði ekki. Þá gerðist það að ég striplaðist fyrir framan saklaust barnið.“ Þú hefur engar áhyggjur að þetta hafi eftirköst? „Það geri ég, til dæmis gæti barnaverndarnefnd bankað upp á hvenær sem er og til að fyrirbyggja að barnið hljóti varanlegan skaða, hef ég pantað tíma fyrir það í samtalsmeðferð hjá áfallahjálparstreituröskunarsálfræðingi með sérstaka áherslu á flóðhestafælni.“ Einmitt það.

Slefað og skeint þakkar Sigurgeiri Orra fyrir spjallið. 

Eitrum fyrir þeim

Ég mæli sérstaklega með rottueitri, það er fljótvirkt, lyktarlaust og bragðlaust.

Stefnt að útrýmingu biðlista

Endurunnið traust

Ég myndi nú tæplega reyna að endurvinna traustið hans Villa, talsverðar líkur eru á að harla lítið komi úr þeirri endurvinnslu. Mæli frekar með endurvinnslu á áldósum eða brotajárni.

Látin laus af sjúkrahúsinu

Þessi mynd var tekin við það tækifæri. 

Ná verður þjóðarsátt um skarnaframleiðslu

Það verður engin sátt í þessu landi fyrr en sátt hefur náðst um skarnaframleiðsluna, heilsa flóru landsins er í veði! Forsætisráðherra á að undirrita bráðabirgðalög vegna skarnans og skikka alla landsmenn til að dreifa honum á túnin sín. Ég er gjörsamlega gáttaður á þingmönnum sem tala niður til skarnans og vilja að ríkið kaupi upp allan skarnakvótann. Hvað á ríkið að gera við milljón tonn af skarna? Skarninn hefur fylgt landsmönnum allt frá landnámi, lengi vel voru Íslendingar með skarnann á sér, en sem betur fer er hann nú geymdur í sérstökum þróm. Þessar þrær geyma sögu Íslands! Hún verður ekki slitin sundur með vanhugsuðum milljarðakaupum á skarnakvóta!

Talandi um þjóðarsátt, það þarf nauðsynlega að nást þjóðarsátt um skinnasútunina því hún gengur illa, prjónastofur landsins eru allar á hausnum, það þarf að nást þjóðarsátt um að greiða prjónaskapinn niður, þjóðarsáttar er þörf fyrir FL group, þeir standa afar illa, einkum Gnúpur. Þjóðarsátt á Gnúp! Sjoppan úti á horni er við það að leggja upp laupana, það þarf nauðsynlega þjóðarsátt um að styrkja sjoppumenningu landsins, sjoppur eru órjúfanlegur hluti menningar okkar. Tvær kækur takk, sagði einhver spekingurinn, ég segi: Þjóðarsátt um sjoppurnar! Verum ekki sjoppuleg og útbúum greiðslumark og kvótamark og borgum milljarða með þeim svo Baula og Gerpla og allar hinar sjoppurnar fari ekki á gaddinn. 

Ná verður þjóðarsátt um mjólkurframleiðslu