Sökudólgurinn

Hverjir eru það sem bjóða sig fram til að stjórna efnahagslífinu? Stjórnmálamenn.

Hverjir eru það sem setja leikreglurnar á markaðnum? Stjórnmálamenn.

Hverjir eru það sem settu ríkisábyrgð á innistæður í bönkum? Stjórnmálamenn.

Hverjir eru það sem nú eru að reyna að bjarga því sem bjargað verður? Stjórnmálamenn.

Hverjir eru það sem setja á stofn eftirlitsstofnanir á borð við Fjármálaeftirlitið? Stjórnmálamenn.

Hverjir hafa með hagstjórn landsins að gera? Stjórnmálamenn.

Hverjir sömdu fyrir Íslands hönd um EES? Stjórnmálamenn.

Hverjir ákveða stýrivexti? Stjórnmálamenn.

Hverjir hafa umsjón með seðlaprentun? Stjórnmálamenn.

Hverjir funduðu með breskum stjórnvöldum um Icesave? Stjórnmálamenn.

Hverjir hækkuðu lánshlutfall Íbúðalánabanka ríkisins upp í 90%? Stjórnmálamenn.

Hverjir lánuðu í nafni Íbúðalánabanka ríkisins öðrum bönkum 100 milljarða í samkeppni við Kaupþing á húsnæðislánamarkaði með tilheyrandi verðbólu? Stjórnmálamenn.

Hverjir reka Seðlabankann? Stjórnmálamenn.

Hverjum er hrun fjármálamarkaðsins að kenna? Nú auðvitað Kaupþingi.

Afglapinn

Ég er búinn að átta mig á því að Geir Haarde er afglapi sem gerði Sjálfstæðisflokknum meira ógagn en gagn. Ég vissi svo sem fyrir að hann væri einungis fær um að vera leiðtogi í góðu árferði. Davíð Oddsson hins vegar var frábær leiðtogi í vondu árferði en síður góður í góðu árferði. Þá skorti hann verðuga viðspyrnu. Vefþjóðviljinn fer fyrir afar góðu uppgjöri og umfjöllun um Sjálfstæðisflokkinn nú um stundir sem ég hvet alla til að lesa.

Aðgerðir ríkisins

Eftir kreppuna miklu árið 1929 settu stjórnmálamenn í Bandaríkjunum í gang mikið opinbert kerfi sem átti að koma hjólum efnahagslífsins í gang á ný. Það gerðist ekki. Það sem kom hjólum efnahagslífsins á sama snúning og fyrir kreppuna var heimsstyrjöldin. 1942 fór atvinnuleysi í Bandaríkjunum fyrst niður í sömu tölu og fyrir 1929. Það er svolítið skondið að á ráðstefnu stærstu iðnríkja heims sem haldin var í London 1932 til að finna leiðir út úr kreppunni var aðalmálið að fá stjórnmálamenn til að gera ekki það sem þeir höfðu gert, eða ætluðu að gera: Leggja ekki á verndartolla og önnur innflutningshöft. Er það ekki nokkuð kaldhæðnislegt að helstu aðgerðirnar gegn kreppu er að biðja stjórnmálamenn að hafast ekki að? Samt er eins og þeir haldi að þeir einir geti leyst vandann, vanda sem aðgerðir þeirra og yfirsjónir komu heiminum m.a. í. Ég vil ekki vera of svartsýnn, en ég óttast að aðgerðir stjórnmálamana séu verri en engar aðgerðir stjórnmálamanna.

Too big to fail

Hver kannast ekki við fyrirtækin sem eru of stór til að fara á höfuðið? Hver kannast ekki við einstaklinga sem eru of litlir til að skipta máli? En ekki lengur. Egozentric™®© París, London, Róm, Mílanó hefur sett á markaði í samvinnu við góðan viðskiptavin bol sem gerir öllum kleift að vera „too big to fail“ eins og sagt er í útlöndum núna. AIG bónusatryggingarisinn með stjórnmálamennina vini sína, er slíkur risi. Hvers vegna ekki þú? Sýndu heiminum að þú ert svo stór að þú getur hreinlega ekki farið á höfuðið.

Too big to fail. Litur svartur, stærð 1-100. Sýndu þessum óréttláta heimi að þú ert líka of stór til að fara á höfuðið. Verð aðeins 50 dalir. 0.1% af sendingarkostnaði rennur óskipt í bjargráðasjóð AIG.

Alfreð Elíasson og Loftleiðir

Hér er sýnishorn úr heimildarmynd minni um Alfreð Elíasson og Loftleiðir sem sýnd verður í Sambíóunum í maí.

Hafið þið virkilega ekkert betra að gera?

Stríðið gegn kannabisframleiðendum er fullkomin sóun á tíma og fé. Æpandi misræmi er í hvaða fíkniefni eru lögleg og hver ekki (góð og vond). Hver er þess umkominn að ákveða fyrir mig hvort ég reyki gras eða drekki vodka? Bann við kannabis er lítilsvirðing á frelsi mínu. Ég er fyllilega dómbær um það hvort og hvaða fíkniefni ég ákveð að láta ofan í mig.

„Stríðið“ er sóun á tíma og fé vegna þess að það er dæmt til að tapast. Það var umfjöllun um „stríðið“ gegn kannabis í Kaliforníu í sjónvarpinu um daginn. Farið í flugferð með þyrluflugmanni sem hefur það að atvinnu að koma auga á staði þar sem kannabis er ræktað (en það vex allstaðar utandyra í „sunny California“). Hann sagði að fyrir nokkrum árum hafi hann þurft að fljúga í hálftíma áður en hann fann akur. En nú þurfi hann bara að fljúga í fimm mínútur. Hann lýsti þeirri skoðun sinni að hann teldi þetta stríð tapað. Milljarðakostnaður til einskis í ríki sem er gjaldþrota.

Í stað þess að lögleiða kannabis og skattleggja og hafa af því tekjur, velur ríkið (stjórnmálamenn), að halda vitleysunni áfram. Afleiðingar stríðsins eru skelfilegar. Sundraðar fjölskyldur, yfirfull fangelsi (með tilheyrandi kostnaði), rán og aðrir glæpir og það sem etv. verst er: Sumir upplifa sig sem glæpamenn vegna þessara heimskulegu laga; eru með vonda sjálfsmynd og eiga sér erfitt uppdráttar. Enginn sem fær sér bjór fær á samviskuna: Ég er glæpamaður! Hann bara drekkur sinn bjór og slappar af, alveg eins og það ætti að vera með gras. Þeir sem vilja eiga að geta reykt það í friði og spekt án glæpastimpils frá yfirvöldum. Það er nú kapítuli út af fyrir sig munurinn á þeim sem drekka og þeim sem reykja gras: Drukknir menn eru ósjaldan ofbeldishneigðir, skakkir menn eru rólegir og friðsamir. Væri það ekki skárri kostur af tveimur vondum?

Lögregluyfirvöld ættu heldur að rannsaka t.d. þátt stjórnmálamanna í bankahruninu, en að eltast við þá sem skapa verðmæti innanlands með ræktun á kannabis. Meðan grasið vex á Íslandi, þarf ekki að greiða fyrir það með dýrmætum gjaldeyri. Þetta „stríð“ er tap tap tap.

Hvenær munu stjórnmálamenn horfast í augu við staðreyndirnar og hætta að láta ímyndun um „fyrirmyndarsamfélag“ villa sér sýn? Átta sig á að boð og bönn í þessu efni er engin lausn? Átta sig á að hver og einn hefur rétt, og líka skyldu, til að bera ábyrgð á sjálfum sér?

Hald lagt á 650 kannabisplöntur

Þeir fagna ekki

Áhyggjufólk um hlýnun jarðar sagði að ástæðan væri bröltið í manninum. Reiknað var út að með áframhaldandi brölti myndi hlýna um 0.7 gráður á 100 árum. Nú hefur snarlega dregið úr brölti svo skiptir tugum hundraðshluta og ekki lítur út fyrir að fyrri umsvifum verði náð í bráð. Enginn úr áhyggjuhópnum hefur opinberlega, að mér vitandi, fagnað því. Ættu þeir ekki að vera í skýjunum? Ætti ekki einhver að vera búinn að skrifa grein í Lesbókina og fagna því að nú lítur ekki út fyrir að það hlýni um 0.7 gráður á næstu 100 árum heldur 0.5? Að það þurfi sem betur fer ekki að skattleggja útblástur um 10 skrilljarða, heldur 5 skrilljarða?

Hlýnunarsinnar í Bandaríkjunum láta eins og ekkert sé og hafa eyrnamerkt stórar upphæðir til baráttunnar gegn alheimshlýnun af mannavöldum í þeim útgjaldapakka sem á víst að koma hjólum efnahagslífsins í gang á ný. Al Gore brosir út að eyrum.

Svo fréttist af ráðstefnu í Kaupmannahöfn þar sem niðurstaðan var að allt væri að fara til andskotans, jörðin eins og pottur með pylsum sem er að sjóða uppúr. Kreppan virðist ekki hafa haft nein áhrif þótt vitað sé að útblástur koltvísýrings hafi stórminnkað um allan heim.

Er ekki eitthvað bogið við þetta? Getur verið að þetta sé vísbending um að staðreyndirnar skipta engu máli í þessu sambandi?

Ég man ekki hvort ég er búinn að segja frá því á þessu bloggi, en ég las bók nýlega sem heitir: Myths, Lies and Downright Stupidity eftir John Stossel. Í henni er Alheimshlýnunarmálið af völdum manna sett í flokkinn: Trúmál. Þessvegna set ég þessa færslu í flokkin Trúmál og siðferði.

Upplýstur

Hver kannast ekki við að hafa verið haldið úti í kuldanum og ekki verið upplýstur um eitt eða neitt? En ekki lengur. Nú er komin á markað nýr bolur frá Egozentric™®© París, London, Róm, New York, sem minnir alla á að þótt þeir séu ekki hafðir með í ráðum, eru þeir aðeins kettlingar í samanburði við suma. Sumir sem eiga að heita æðstu ráðamenn þjóðarinnar í málefnum viðskipta voru algerlega úti að aka þegar viðskiptalífið var annars vegar. Og þegar það kom í ljós, sögðu þeir af sér? Nei, ekki fyrr en það átti að rjúfa stjórnarsamstarf og það hentaði vel í stjórnmálaspilinu. Ef þér líður stundum eins og ákvarðanir séu teknar án þín og þú sem hélst að þú værir ómissandi, hættu að hafa áhyggjur. Kauptu bol og minntu heiminn á að þú munt aldrei komast með tærnar þar sem sumir hafa hælana. Og það sem meira er: Þeir komast upp með það! Ef það er ekki hægt að græða á þessu, skal hundurinn Björgvin heita.

Upplýstur. Litur bleikur með svörtum ermum og grænum kraga. Stærð 1-100. Vertu ekki grænn á bak við eyrun, vertu upplýstur og í rétta liðinu. Segðu ekki af þér fyrr en það hentar og láttu eins og ekkert sé. Vatn til sjávar farið er, en ég er ennþá hér. Kjósið mig og ég mun spila í rétta liðinu og vera með á nótunum. Ekki halda að upplýsingaskortur minn sé til marks um vinnubrögð flokksins. Nei, þar er talað og talað og talað, enda umræðustjórnmál efst á dagskránni. Hlutir ræddir og allir upplýstir. Verð aðeins 50 dalir. 0.1% af sendingarkostnaði rennur óskipt til lestrarkennara Björgvins G. Sigurðssonar.

Blómavasinn minn

Á borðinu hjá mér er blómavasi, glær úr gleri. Í Tinnabókunum kom alltaf orðið GLIRR! þegar gler brotnaði. Eftirminnilegt. Ég fór um daginn út í garð og týndi blóm í vasann. Þau eru nú orðin visin og það er byrjaður að vaxa arfi í yfirborðinu. Ég þarf að fara aftur út og tína fleiri blóm. Í næsta húsi er verið að háþrýstiþvo eitthvað. Ég er svangur, það er hádegi. Ég ætla í klippingu í dag. Er kominn með lubba. Fæ mér etv. kaffibolla á Kaffi Klatch. Þar afgreiðir listrænn strákur og skrýtin stúlka situr ósjaldan í sófanum. Hún samkjaftaði ekki við mig um daginn og var með lyfjabiblíuna. Spurði mig hvor ég væri með AIDS. Ég sagðist ekki vita til þess. Hún fletti einhverju lyfi upp í bókinni og talaði um það. Hún var þar aftur í gær. Ég talaði ekki við hana. Svo fór hún. Talaði við tvær kenndar unglingsstúlkur sem voru að reykja fyrir utan bar. Þær voru að fagna degi heilags Patreks. Önnur var akfeit. Fífillinn sem ég tíndi er orðinn að fífu. Áður voru lavenderstrá í vasanum. Ilmuðu vel en dreifðust um allt. Í garðinum eru sóleyjar. Best ég tíni þær.

Hefðbundið lýðræði

Hver kannast ekki við að hafa tekið þátt í hefðbundnu og frekar hallærislegu prófkjöri? En ekki lengur. Nú er búið að finna upp nýja og mjög lýðræðislega leið til að velja á lista. Til að fagna hinni nýju aðferð sem annars vegar kallast Samfylkingarlýðræði (þar sem alvitrir foringjar raða sjálfum sér efst og leyfa ræflunum að berjast um neðri sætin) og hins vegar Vinstri grænt lýðræði (þar sem kynferði er sett í öndvegi án tillits til hæfileika eða vinsælda) hefur Egozentric ™®© París, Mílanó, Las Vegas, New York, hannað bol sem sýnir fram á svart á hvítu hversu óspennandi og óheillandi hefðbundið prófkjör er. Eini kosturinn við hefðbundna prófkjörið er sá að þar er ekki gerður neinn greinarmunur á hvað er í klofi frambjóðendanna svo lengi sem einhvers staðar í grenndinni sé rass. Sagt er að sami rassinn sé undir þessu liði hvort sem er og því skipti kynið engu máli. Egozentric™®© vill ekki taka undir það en telur að öllum sjónarmiðum eigi að gera jafn hátt undir höfði, sérstaklega ef á þeim er hægt að græða.

Hefðbundið prófkjör. Stærð 1-100. Litur svartur. Láta í körfu. Sýndu að þú getur greint kjarnann frá hisminu, skóginn frá trjánum og aðalatriðin frá aukaatriðunum. Gakktu um í bol til staðfestingar um það. Láttu ekki gargið glepja þér sýn. Verð aðeins 50 dalir. Eignastu alla prófkjörsseríuna (3 boli) fyrir aðeins 400 dali. Áritaða fyrir 700 dali.