Sökudólgurinn fundinn

Hver kannast ekki við að hafa tapað stórfé á fallandi hlutabréfum, frábærum viðskiptaháttum, glæsilegum fjárfestingum og framsýnum ákvörðunum en ekki haft neinn til að kenna um? En ekki lengur. Egozentric™®© hefur í samvinnu við góðan viðskiptavin fundið sökudólginn. Hann er enginn annar en Davíð Oddsson seðlabankastjóri. Eftir að góði viðskiptavinurinn benti aðalhönnuðinum á staðreynd málsins varð það allt svo skýrt og klárt. Auðvitað! Davíð Oddsson er maðurinn í Seðlabankanum sem vill ekki gefa peninga ríkisins til útrásarvíkinganna sem sigrað hafa heiminn en þurfa nú á lítilsháttar stuðningi að halda við að kaupa bensín á Bentleyinn. 

En fátt er með svo öllu illt að ekki megi á því græða. Því hefur Egozentric™®© sett á markað bol þar sem þessi sanna fullyrðing er sett fram á afgerandi hátt.

Fjármálakreppa heimsins er Davíð Oddssyni að kenna. Litur: Svartur. Stærð 1-100. Ekki láta útrásarvíkingana, kaffihúsaspekingana og stöku lögfræðinga einoka Davíðspúkann, taktu þér sjálfur Davíðspúka í sálina og kenndu um allt sem miður hefur farið í þínu lífi, lífi þjóðarinnar, lífi vina þinna og fjármálalífi heimsins í heild sinni. Verð 8999 krónur. Ath. fæst aðeins í TopShop.

Athugasemdir

[Ragnhildur Kolka, 1.10.2008 kl. 21:33]

Sorry Sigurgeir, slæm tímasetning í markaðsútrásinni. DO bolirnir ættu með réttu að fylla alla fataskápa landsins. Það hefðu þeir líka gert ef kreppan hefði ekki rústað fjárhag heimilanna.

Við verðum að láta forsetabolina duga fram til 1. des. en þá skilst mér að stolt þjóðarinnar verði endurheimt.

[Guðmundur Bergkvist, 2.10.2008 kl. 10:07]

Davíð er Frankenstein sem skapaði skrímslið og brjálaðist svo þegar hann missti stjórn á því. Hann gleymdi því að það þarf einhverjar reglur fyrir svona bissnesslið. Það er ástæða fyrir því að græðgi er nefnd sem ein af dauðasyndunum 7. Það er græðgi er að verða okkur að falli vegna þess að gráðugir bissnessmenn fengu að leika lausum hala.

[Sindri Guðjónsson, 2.10.2008 kl. 11:20]

Frændi minn keypti sér hús. Hann tók lán. Hann var rétt byrjaður að borga af húsinu, þegar hann vildi endilega kaupa jörð í öðru bæjarfélagi, og byrja að byggja þar líka. Hann tók annað lán, með veð í húsi sem hann var ekki enn búinn að borga. Í leiðinni keypti hann sér stóran Jeppa. Skyndilega rjúka lánin upp. Auðvitað er þetta Davíð að kenna. Frændi minn er að fara á hausinn.

[Sigurgeir Orri Sigurgeirsson, 2.10.2008 kl. 16:58]

Nákvæmlega hárrétt hjá þér Beggi, Davíð bjó til skrímslið sem nú ætlar allt lifandi að drepa, hvort sem það er í Bandaríkjunum eða á Fáskrúðsfirði. Frændi hans Sindra er saklaust fórnarlamb Davíðs, það sér hver maður.

Síðasti Forsetabolurinn hefur ekki litið dagsins ljós, það er ljóst. Fullveldið er mikilvægt mál eins og allir vita, ég tala nú ekki í þessari gúrkutíð sem nú er svo áberandi í fjölmiðlunum.

[Guðmundur Bergkvist, 2.10.2008 kl. 18:01]

Já illa skapað skrímsli sem veður áfram í hamslausri græðgi og enginn hefur ráðið neitt við. Nánast engar reglur, enda fór sem fór og saklausir skattborgarar sem vinna baki brotnu fá að kenna á hálfvitunum sem eru búnir að setja þjóðfélagið á hausinn. Þótt það sé alheimskreppa þá hefði verið betra að hafa skýrar reglur í upphafi og svo væri afar æskilegt þessum skelfilegu tímum að vera ekki hrokafulla dýralækna í fjármálaráðuneytinu og pólitíkusa að þykjast vera seðjabankastjórar svo eitthvað sé nefnt.

[Geir Ágústsson, 2.10.2008 kl. 21:52]

Allir sem þekkja ekki til peningakenninga hins austurríska hagfræðiskóla eiga skilið að fá nafn sitt á ofansýndan bol.

[Sigurgeir Orri Sigurgeirsson, 3.10.2008 kl. 22:25]

Pólitíkus að þykjast vera seðlabankastjóri, hver er það? Ég veit um einn sem ER seðlabankastjóri og er trúlega hæfasti maðurinn til þess starfs í ljósi reynslu og menntunar. Undir hans forystu jókst velferð á Íslandi gríðarlega. Það eru bara bjánar sem halda því fram að Davíð sé ekki hæfur í það starf sem hann gegnir nú. Íslendingar ættu að vita það manna best að það skiptir máli hvaða stjórnmálamenn eru í forystu fyrir land og þjóð.