Gátan um jólatréð leyst

Ég man hvað ég hló að Dave Allen þegar hann gerði grín að þeim sið að taka árlega afskorið tré inn í stofu og skreyta það. Hef alltaf furðað mig á þessu, en tekið þátt engu að síður, enda jólabarn. Um daginn fékk ég skyndilega einskonar vitrun, áttaði mig á því hvers vegna þetta er gert. Jólin eru sólstöðuhátíð þar sem því er fagnað að daginn er tekið að lengja á ný. Jólatréð, eða sólartréð, er vitaskuld tákn þess að brátt tekur gróðurinn við sér og trén laufgast. Jólatréð er hrísla sem tekin er inn í hús og laufguð með skrauti. Jólaserían og kúlurnar eru tré í skrúða með ávöxtum. Auðvitað! Að ég skyldi ekki átta mig á þessu fyrr!

Eðliegast er að taka lauflausa hríslu og skreyta, en grenitrén eru líka falleg. Ég fyrir mitt leyti fagna hækkandi sól engu minna þótt skeggjaður maður í skikkju ráfi um í veislunni. Sagan af honum er skemmtilegur spuni utan á sólstöðuhátíðina.

Athugasemdir

[Svavar Guðmundsson, 23.1.2009 kl. 17:54]

Skemmtilegar pælingar hjá þér séra Sigurgeir.  Sólartré er fallegt orð yfir tré almennt.  Greinilegt að sólin skín á kollinn á þér þessa dagana.

[Eygló, 23.1.2009 kl. 22:51]

Já, en!  Þarf ekki að grisja?

Viltu líka skýra þetta betur út, ef þú nennir:

"Ég fyrir mitt leyti fagna hækkandi sól engu minna þótt skeggjaður maður í skikkju ráfi um í veislunni"

Minn skilningur er ekki klár. Finnst þú hafir gleymt einu orði...

Mér líður virkilega illa útaf þessu. Ég verð að segja það.

[Sigurgeir Orri Sigurgeirsson, 24.1.2009 kl. 17:15]

Skeggjaði maðurinn í skikkjunni er sá maður sem gleymt hefur afmælisdegi sínum en heldur að hann sé um þetta leyti.