Bolir á útsölu

Ég var beðinn fyrir hönd ákveðinnar hönnunarstofu hér í bæ að falbjóða tvo boli á niðursettu verði. Mér finnast þessir bolir frekar ljótir (litlausir, minna á gráan hversdagsleika kommúnistaríkjanna sálugu) og hvet engan til að kaupa þá, en ég kann ekki við að vera dónalegur við vin minn sem bað mig að gera sér þennan greiða.

 

Þennan texta bað hann mig að láta fylgja með:

Afsláttarverðið er ekkert minna en æðislegt, þú sparar 378% frá listaverði og þarft aðeins að reiða fram 29,990 krónur fyrir stykkið, staðgreitt. Inn í þessu einstaka afsláttarverði er 30% virðisaukaskattur, en hann er hafður svona hóflegur vegna hinnar GLÆSILEGU niðurstöðu íslensku samninganefndarinnar í Icesave málinu. Sérstakur afsláttur er veittur ef báðir bolirnir eru keyptir, eða 456% af listaverði. Samtals kosta bolirnir tveir, pakkaðir í plast, aðeins 75,990 krónur.

Bolirnir fást í öllum stærðum, hvítir með svötru letri. 0,001 prósent af sendingarkostnaðinum rennur óskipt til Stjórnmálamannahjálpar Sameinuðu þjóðanna.

Athugasemdir

[Ragnhildur Kolka, 25.1.2010 kl. 19:40]

Bíddu! Sleppum við þá við að borga 2milljónirnar á kjaft? 

[Sigurgeir Orri Sigurgeirsson, 2.2.2010 kl. 04:16]

Aldeilis ekki, og það eru ánægjulegar fréttir. Nýjustu útreikningar sýna að talan er ekki tvær hallærislegar milljónir á mann, heldur stórkostlega rennilegar þrjár milljónir á mann! Það er miklu skemmtilegri tala og víst er að margir munu taka slíka smámuni á sig með bros á vör.

[Ingvar Valgeirsson, 2.2.2010 kl. 21:21]

3 millur - má ekki minna vera, enda glæsileg niðurstaða á heimsmælikvarða.

Náðarsamlegast sendu mér sett af svona bolum á eftirfarandi heimilisfang:

Ruppur Roðfletti

Handleggsbraut 12

666 Mannleysuströnd